رێکخراوا ستێپ

ئەڤ دەسپێشخەریە ب هەماهەنگیەکا نێزیک دگەل وەزارەتا کار و کاروبارێن جڤاکی، رێڤەبەریێن دەستەبەریا جڤاکی ل پارێزگەهێن دهێنە ئارمانجکرن، ئێکەتیێن کارگوزاران، و زانکویا دهۆکێ هاتە ئەنجامدان.

ئارمانج و چالاکی:

پڕۆژەیێن کارگوزارێن کەرتێ تایبەت، خودانکار، بڕیاربدەست، قوتابیێن زانکۆیێ و جەماوەرێ گشتی ئارمانج کربوون. ئەڤ چەندە ژی ب رێکا چالاکیێن جودا یێن ئایینی، رەوشەنبیری، گەنجان، هونەری، راگەهاندنێ و جڤاکی هاتە کرن.

ژمارا کەسین مفا ژ پرۆژەی دیتی: 27,000 کەسان ب شێوەیەکێ راستەوخۆ و نەراستەوخۆ (نێر و مێ) مفا ژ ڤی پڕۆژەی وەرگرت.

بۆچی ئەڤ پڕۆژە هاتە ئەنجامدان؟

ئەڤ پڕۆژە وەکو ئەنجامەک بۆ لاوازیا هوشیاریێ ب یاسایا دەستەبەریا جڤاکی د ناڤبەرا کارگوزارێن هەرێما کوردستانێ دا هاتە بجهئینان. ئەڤ کێمیا زانیاریان دبیتە ئەگەرێ بێبەشبوونا تەخێن بەرفرەهـ یێن کارگوزاران ژ پاراستنا جڤاکی، مافێن خانەنشینیێ و ئیمتیازاتێن دەستەبەریێ.

پڕۆژە وەک بەرسڤەک بۆ ڤان پێدڤیان هاتە راگەهاندن:

1- زێدەکرنا هوشیاریا یاسایی ل دەڤ کارگوزاران ل دۆر ماف و ئەرکێن وان.

2- بەرەڤ پێشبرنا کولتۆرێ پێگیربوون ب یاسایێ ل دەڤ خودانکاران.

3- پشتەڤانیکردنا بزاڤێن حکومەتێ بۆ بەرفرەهکرنا کارکرن ب دەستەبەریا جڤاکی.

ئارمانجێن پڕۆژەی:

ئارمانجا گشتی: بلندکرنا ئاستێ هوشیاریا جڤاکی ب یاسایا دەستەبەریا جڤاکی و مافێن کارگوزاران ل پارێزگەهێن دیارکری.

ئارمانجێن تایبەت:

زێدەکرنا زانیاریێن کارگوزاران ل دۆر ماف و ئەرکێن وان یێن یاسایی.

هاندانا خودانکاران بۆ تومارکرنا کارگوزاران د سیستەمێ دەستەبەریا جڤاکی دا.

پشکدارکرنا بڕیاربدەستان و سەرکردێن جڤاکی بۆ پشتەڤانیکرنا بجهئینانا یاسایێ.

هەڤپشکێن بجهئینانێ:

وەزارەتا کار و کاروباری جڤاکی.

رێڤەبەریێن دەستەبەریا جڤاکی.

ئێکەتیێن کارگوزاران.

زانکویا دهۆکێ.

چالاکییێن پڕۆژەی:

چالاکییا 1: پشکداری د فێستەڤالا سالڤەگەرا 56 یا پارێزگەها دهۆکێ دا: رێکخراوا ستىپ پشکداری د فێستەڤالا فەرمی یا سالڤەگەرا دامەزراندنا پارێزگەها دهۆکێ دا کر، کو ب هەماهەنگی دگەل رێڤەبەریا گشتی یا رەوشەنبیری و هونەری هاتبوو رێکخستن. ستێپ تاکە رێکخراوا نەحکومی بوو کو ب رەنگەکێ بابەتیانە پشکدار ببوو؛ ل وێرێ جناحەکێ تایبەت بۆ ناساندنا یاسایا دەستەبەریا جڤاکی یا کارگوزاران هاتە ئاڤاکرن، دا کو ڤی جەماوەرێ مەزن وەک دەلیڤەکا ستراتیژی بۆ هوشیارکرنێ بکاربینیت، چونکی فێستەڤالێ کارگوزار، خودانکار، فەرمانبەر، گەنج و خێزان ل ئێک جهـ کۆمکربوون.

چالاکییا 2: کەمپینا هوشیاریێ ب رێکا وتارێن ئەینیێ و ئاراستەکرنا مامۆستایێن ئایینی: ژبەر رۆلێ کاریگەر یێ مامۆستایێن ئایینی د چێکرنا هوشیاریا جڤاکی دا، رێکخراوا ستیپ هەماهەنگی دگەل رێڤەبەریا ئەوقافا دهۆکێ کر بۆ گەهاندنا پەیامێن هوشیاریێ د ناڤ وتارێن ئەینیێ دا. کۆمبوونێن هەماهەنگیێ دگەل ژمارەکا پێشنوێژ و گوتاربێژان هاتنە ئەنجامدان و کەرەستێن ناساندنێ یێن سادە ل سەر یاسایا دەستەبەریێ پێشکەشی وان هاتنە کرن. هەروەسا ب رێکا خۆبەخشان ل بەر دەرگەهێن مزگەفتان ل دووماهیا نڤیژێ، بەلاڤوکێن هوشیاریێ هاتنە بەلاڤکرن. زێدەباری ڤێ چەندێ، خۆلەکا ناساندنێ بۆ 12 مامۆستایێن ئایینی هاتە رێکخستن دا کو زانیاریێن وان ل سەر یاسایێ بهێزتر لێ بهێن.

چالاکییا 3: روینشتنا هوشیاریێ ل کەمپا شاریا بۆ ئاوارەیان: ئەڤ چالاکیە تایبەت بوو بۆ ئاوارەیێن ناڤخۆ، ب تایبەت کارگوزارێن نە فەرمی و ئەو ژنێن کارێن مال یان کارێ رۆژانە دکەن. ل وێرێ نوێنەرێ رێڤەبەریا دەستەبەریا جڤاکی ب شێوەیەکێ سادە مەرجێن تومارکرنێ و مفایێن وێ یێن دوورمەودا دیارکرن. هەروەسا چیرۆکەکا سەرکەفتی یا کارگوزارەکێ کەرتێ تایبەت هاتە نیشاندان کو پشتی تومارکرنێ د دەستەبەریێ دا، مووچەیێ خانەنشینیێ وەرگرتبوو.

چالاکییا 4: فێستەڤالا چارێ یا گەنجان – زانکویا دهۆکێ: ئەڤ چالاکیە هەڤدەم دگەل رۆژا جیهانی یا گەنجان هاتە ئەنجامدان. ل وێرێ شانۆگەریەکا کورت هاتە نیشاندان کو جوداهیا د ناڤبەرا کارگوزارێ تومارکری و یێ نە تومارکری دا دیار دکر، دگەل نیشاندانا ڤیدیۆیەکا ئینفۆگرافیک ل سەر بەندێن یاسایێ.

چالاکییا 5: چالاکییا ڤەکری ب هەلکەفتا رۆژا جیهانی یا موزیکێ: ئەڤێ چالاکیێ هونەر و هوشیاریا یاسایی پێکڤە گرێدان. ب رێکا موزیکا زیندی خەلک ل دەوروبەرێن خۆ کۆمکرن و ڤیدیۆیێن کورت ل سەر شاشەیێن مەزن ل ناڤەندا باژێرێ دهۆکێ هاتنە نیشاندان، دگەل بەلاڤکرنا برۆشۆرێن هوشیاریێ.

چالاکییا 6: پێشبڕکێیا هونەری – باخچێ باغێ شار لهەڤلیرئ: 20 هونەرمەندان پشکداری د کێشانا تابلۆیێن زیندی دا کر کو گوزارشت ژ (کەرامەتا کارگوزاری، پاراستنا جڤاکی، و دەستەبەریا خانەنشینیێ) دکر. پێشانگەهەک ل باخچێ "باغێ شار" ل سەنتەرێ باژێرێ هەولێرێ هاتە ڤەکرن، و تێدا چیرۆکا سەرکەفتنا کارگوزارەکێ خانەنشین یێ کەرتێ تایبەت هاتە پێشکێشکرن.

چالاکییا 7: پشکداری د لوتکەیا نیشتمانی یا کارسازیێ دا ل سلێمانیێ: ئارمانجا ڤێ چالاکیێ خودانێن کارێن بچووک و ناڤنجی بوون. ورکشۆپەک هاتە ئەنجامدان کو تێدا نوێنەرێن ئێکەتیا کارگوزاران، رێڤەبەریا دەستەبەریا جڤاکی و رێکخراوا ستیپ پشکدار بوون بۆ دیارکرنا گرنگیا دەستەبەریێ بۆ خودانکاران.

چالاکییا 8: پێشبڕکییا چێکرنا ڤیدیۆیێن کورت: هاندانا گەنجان و چێکەرێن ناڤەرۆکێ (Content Creators) بۆ بەلاڤکرنا پەیامێن هوشیاریێ ل سەر سۆشیال میدیایێ. هەمی ڤیدیۆ ل سەر پەیجێن رێکخراوێ هاتنە بەلاڤکرن دا کو بگەهنە زۆرترین تەخێن جڤاکی.

چالاکییا 9: کەمپینا هوشیاریێ ل جەژنا رۆژیێن ئێزی – خانکێ لدەڤەرداریا سیمیلی: ب مەرەما گەهاندنا پەیامێ د بۆنەیێن ئایینی و رەوشەنبیری دا، رێکخراوا ستێپ بەلاڤوکێن هوشیاریێ ل سەر پشکداران ل ناحیا خانکێ بەلاڤکرن.

چالاکییا 10: کەمپینا هوشیاریێ د ئاهەنگێن جەژنا ژدایکبوونێ (Christmas) دا: کەرەستێن هوشیاریێ ل سەر ئامادەبوویان هاتنە بەلاڤکرن، ب مەرەما پشتراستبوون ژ هندێ کو کەمپین هەمی پێکهاتەیێن ئایینی بخۆڤە دگریت.

چالاکییا 11: پێشانگەها دەلیڤێن کاری – زانکویا دهۆکێ 2026 ئەڤێ چالاکیێ پەیوەندی د ناڤبەرا دەلیڤێن کاری و پێگیربوونا ب دەستەبەریا جڤاکی دا دروستکر. 72 کۆمپانیان پشکداری تێدا کر و 150 دەلیڤێن کاری پێشکێشکرن. ل وێرێ یاداشتنامەکا لێک تێگەهشتنێ هاتە ئیمزاکرن بۆ بهێزکرنا هەماهنگیێ د بەلاڤکرنا هوشیاریێ دا.

چالاکییا 12: کۆنفرانسێ دووماهیێ یێ پڕۆژەی: ب ئامادەبوونا بریکارێ وەزیرێ کار و کاروباری جڤاکی ل هەرێما کوردستانێ، کۆنفرانسێ دووماهیێ هاتە ئەنجامدان کو سێ تەوەر بخۆڤە دگرتن، تەوەرێ ئێکێ، رێڤەبەرێ دەستەبەریا جڤاکی ل دهۆکێ باس ل ئیمتیازاتێن یاسایێ کر (خانەنشینی، قەرەبوویا کار برینداربوونا کار، مۆلەتێن دایکینیێ، و کەم ئەندامی)، تەوەرێ دووێ: سەرۆکێ ئێکەتیا کارگوزاران ل دهۆکێ بەحس ل رۆلێ ئێکەتیێ و ئاستەنگێن پاراستنا مافێن کارگوزاران کر. وە تەوەرێ سێیێ: جێگرێ رێڤەبەرێ رێکخراوا ستیپ ئەنجام و دەستکەفتێن پڕۆژەی پێشکێشکرن.